Һуралсалай жэлэй дүүрэхэдэ, гэртэхин бүхэн зунай амаралтада үхибүүдээ хайшань эльгээхэб гэһэн асуудалда абтадаг. Тиихэдэ Яруунын аймагай ажаһуугшад «Яндала» гэһэн хүүгэдэй элүүржүүлгэ-амаралгын зунай лагерьта эльгээхэ аргатай байдаг.

Эндэ жэл бүри заншалта ёһоороо хүүгэдэй дүнда тамирай мүрысөөнүүд үнгэргэгдэжэ байдаг. Энэ хэмжээ ябуулгануудые Яруунын аймагай Дотоодын хэрэгүүдэй яаманай ажалшад эмхидхэдэг юм.

Энэ жэлдэ «Фабрика добрых дел» гэһэн программа бэелүүлэгдэжэ байнхай. Түрүүшын хаһада тэндэ хүндэ байдалда оронхой, бүридхэлдэ абтагдаһан болон олон үхибүүдтэй айлай хүүгэд амардаг. Бүхыдөө 55 үхибүүд 3 бүлэг боложо хубаардаг, бүлэг бүхэниинь өөр өөрын ажал хүдэлмэритэй юм.