Алтаргана угтуулһан тоглолто Буряад театрта харагшадые олоор суглуулба. Эдэ үдэрнүүдтэ Улаан-Үдэдэ олон тоото хэмжээ ябуулга, мүрысөөнүүд эмхидхэгдэжэ, эрхимлэгшэдынь Буряад уласаа Алтаргана нааданда түлөөлжэ ошохо болоно гээшэ. Тиимэһээ Буряад театрта одоошье соёлой ехэ һайндэр болобо гэхээр. Үндэр тайзан дээрэ уласаймнай эгээл эрхим зохёохы бүлэгүүд, буряад арадай дуу гүйсэдхэгшэд, үльгэршэд гээд сугларһан байна. Гэхэтэй хамта хубсаһа оёгшод, модельер, дизайнернууд буряад хубсаһа мүнөө үеын маягта оруулан бүтээжэ, дурадхана.Заншалта ёһоор хүдөө нютагуудһаа ерэһэн зохеохы бүлэгүүд “Буряад хүнэй нэгэ үдэрые” харуулжа, сэгнэлтэдэ хүртөө. Зүжэгшэд буряад арадайнгаа гайхамшагта аман зохеол, ажабайдал тодоор харуулжа, олоной үзэмжэдэ һайханаар дурадхаһан байна. Үнэхөөрөөшье энэ тоглолтодо ерэһэн зон арадайнгаа аман зохеолой оршон байдалда орожо, зүрхэ сэдьхэлээрээ амарһан байха. Иигэжэ хотын ажаһуугшад уласхоорондын “Алтаргана” нааданда харуулагдаха эрхим бүтээлнүүдые түрүүгэй түрүүдэ хаража үрдибэ гээшэ. Байгша ондо “Алтаргана” Монгол ороной Булган аймагта июлиин хуушаар үнгэргэгдэхэ гээд тэмдэглэлтэй.
