«Дамчой Равжалин» гэһэн Бултамуурай дасан Сэлэнгын болон Хяагтын аймагуудай хилэ дээрэ үзэсхэлэнтэ hайхан газарта оршодог. Дасанай түүхэ 1737 онһоо эхитэй. Табангуудай дасан 1937 он хүрэтэр, гол Согшон дуганһаа гадна, 18 бага дугантай, 700 лама хубарагтай, Ород гүрэн соогоо тон баян дасан гэжэ тоологдожо байдаг һэн. Совет үедэ, 1936 ондо Бултумуурай дасан хаагдаһан. Һүүлээрнь 2006 оной апрелиин 27-до Бултамуурай дасаниие һэргээн бодхоохо тухай хэлсээнэй болоһоной удаа дасанай барилга урагшатайгаар ябуулагдажа захалһан юм.  Согшон дуганай равнай болон нээлтэдэ хэдэн хурал  хурагдажа, байгша оной июлиин 13,14-эй үдэрнүүдтэ үнгэрхэ. Ехэ уншалгын һүүлээр заншалта ёhоор эрын гурбан наадан – бүхэ барилдаан, hур харбалга, мори урилдаан,  мүн лэ тиихэдэ хасагуудай найр, зохёохы болон аман зохёолой бүлэгүүдэй дуу, хатар дэлгэгдэхээр түсэблэгдэнхэй гэжэ шэрээтэ лама хубаалдаба. Нютагай арад зон угсаата дасанаа бодхоохо хэрэгтэ булта эдэбхитэй хабаадалсана.  Бултамуурай дасан анхан бии болоһон сагһаа хойшо дайшалхы үүргэ дүүргэжэ, хилын харуулда гү, холын дайн сэрэгтэ гү, илгаагүй үнэн сэхээр ябаһан Сэлэнгын, Хяагтын, Бэшүүрэй, Зэдын хасаг сэрэгшэдэй найжа-абарагшань байһан, тиихэдэ мүнөө сагта Сэрэгэй тусхай ябуулгада хабаадажа байһан сэрэгшэдэй хамгаалагшань гэжэ тоологдодог.