Тус мүрысөөн заншалта ёһороо Ленинэй орденой кавалер, Дайшалхы Улаан Тугай гурбан ордендо хүртэгшэ, партизануудай бригадын командир Гуржап Очировай түрэһэн нютагта,  Улан һууринда 54-дэхиеэ үнгэрбэ. Мүнөө жэлдэ иишэ 180-яад хүбүүд,  басагад тэмсэхэеэ ерээ. Энэ турнирта сүлөөтэ барилдаагаар Уласхоорондын классай тамирай мастер Батор Цыренов балшар бага наһанһаа хабаададаг  байһан.Турнирта ехэнхидээ Баргажан голой барилдаашад ерээ гэжэ ахамад судья Баир Эрхитуев тэмдэглэнэ.Мүрысөөн Уланай дунда һургуулин тамирай заал соо үнгэрөө, иишэ тамиршадые дэмжэгшэд олоороо ерээ. Жэл бүхэндэ энэ турнирта Гуржап Очировай түрэлхидынь мүрысөөндэ ерэһэн хабаадагшадые дэмжэжэ, дурасхаалта бэлэгүүдые барюулдаг заншалтай. Мүрысөөнэй дүнгүүдээр, Баргажанай аймагай Улан һууринай барилдаашад 1-дэхи һуури эзэлээ, Ивалгын аймаг – 2-дохи, Баргажанай аймагай Баргажанай-Адаг  тосхон – 3-дахи. Илагшад медальнуудаар, үнэтэ бэлэгүүдээр болон мүнгэн шангуудаар урмашуулагдаа.