Улаан-Үдэдэ «Дух Байкала – Солнце Сенегала» гэһэн олзын хэрэг эрхилэлгын харюусалгатай даабариин хэмжээндэ Буряадай ба Сенегалай дизайнернуудай шэнэ гоё эдлэлнүүдые харуулалга болобо. Тус хэмжээ ябуулга Сенегалай олзын хэрэг эрхилэгшэдэй манай уласта албанай хэрэгээр ерэһэн үедэ эмхидхэгдэһэн байна. Эндэ дизайнернууд угсаатанай түхэл маягтай хубсаһа харуулба. Гадна эндэ хоёр уласуудай олзын хэрэг эрхилэгшэдэй бүтээһэн хубсаһанай, гоёолто зүүдхэлнүүдэй, гарай бэлэгүүдэй яармаг эмхидхэгдээ. Сенегалай Уласай олзын хэрэг эрхилэгшэдтэй албан ёһоной уулзалгын түгэсхэлдэ «Опора России» гэһэн Буряадай можо нютагай таһагай, Сенегалдахи «Калинка» гэһэн Оросой соёлой түбэй хоорондо харилсан ажаллаха тухай хэлсээн баталагдаба. Буряадай олзын хэрэг эрхилэгшэд Сенегалай Уласай ниислэл Дакар хото албан ёһоной хэрэгээр ошохо болобо. Тиигэжэ ерээдүйдэ хоёр оронуудай хоорондохи харилсаануудай бэхижэхэнь, үргэдэхэнь дамжаггүй.
