Хоёр огто ондоо гүрэнүүдэй соёл сэдьхэлдээ шэнгээжэ үндыһэн Уми Сен хоёр гүрэнэй олзын хэрэг ба наймаанай хүгжэлтын түлөө хэдэн жэлэй туршада шармайн ажаллана. Эхэнь – ород, эсэгэнь – Сенегал гүрэнэй эрхэтэн, өөрөө Москва хотодо томо болоһоноо уулзалгада ерэһэн олзын хэрэг эрхилэгшэдтэ хөөрэбэ. Дэлхэйн элдэб гүрэнэй ажаһуугшад Орос гүрэн тухай гансал баруугаар байһан томо хотонууд, арадай хубсаһан болон хуһан модон гэхэ мэтэ ойлгосотой байдаг ха юм. Юрэ үнгэрэгшэ жэлдэ Казань хотодо үнгэрһэн олзын хэрэг эрхилэгшэдэй хуралдаанда Сенегалай айлшад Буряад Уласай түлөөлэгшэдтэй танилсажа, Буряад орон руу уригдаһан байна. «Опора России» гэһэн Буряадай можо нютагай таһаг ёһо заншал, соёл хүгжөөдэг олзын хэрэг эрхилэгшэ эхэнэрнүүдые ерэһэн айлшадтай танилсуулан, уулзалга үнгэргэбэ. Энэ уулзалгада Буряад Улас ба Сенегал гүрэн хоёрой наймаанай, кино урлалай талаар харилсан ажаллаха тухай арга боломжонууд хэлсэгдээ, тиимэһээ саашадаа хэлсэгдэһэн ажал үрэ дүнтэй байха гэжэ найдагдана.
