Һаяхан хотодомнай буряад хэлэн болон уран зохёолой, эхин ангиин багшанарай дунда «Эрхим багша» гэһэн мүрысөөн үнгэржэ, уласай эрхим багша элирүүлэгдэһэн байна. Тиихэдэ мүнөө мүн лэ хүүгэдэй сэсэрлигүүдэй буряад хэлэнэй багшанарай болон хүмүүжүүлэгшэнэрэй хоорондо «Эрхим хүмүүжүүлэгшэ» гэһэн мүрысөөн эхиеэ татаба. Эндэ хотын хүүгэдэй 8 сэсэрлигүүдэй багшанар ба хүмүүжүүлэгшэд хабаадана. Мүнөө зарим хүүгэдэй сэсэрлигүүдтэ буряад хэлэ бүри гүнзэгыгөөр үзэдэг болонхой. Энэ болбол тусхай программын ашаар бэелүүлэгдэнэ. Буряад хэлэн дээрэ элдэб янзын мүрысөөнүүд, һайндэрнүүдэй үнгэргэгдэхэдэ, хүүгэд буряад хэлэеэ үшөө дээрээр ойлгодог, хөөрэлдэдэг болоно ха юм. Тус мүрысөөн хэдэн шатаһаа бүридэнэ. Хабаадагшад жюриин гэшүүдэй урда шадабарияа, хэшээлнүүдтээ ямар онол аргануудые хэрэглэдэг байһанаа харуулна, хүүгэдэй хабаадалгатайгаар багахан хэшээлнүүдые үнгэргэнэ. Хотын мүрысөөнэй дүнгүүдээр илажа гараһан хабаадагша уласай хэмжээндэ үнгэрхэ мүрысөөндэ хабаадаха юм. Һүүлээрнь тэндэ илажа гараһан багша сентябрь һарада Казань хотодо үнгэрхэ Бүхэоросой эрхим багшанарай болон хүмүүжүүлэгшэдэй мүрысөөндэ хабаадаха эрхэдэ хүртэхэ.
