Тус хэмжээ ябуулгын тоглолтодо хитад хэлэ үзэжэ байһан оюутад хабаадаһан байна. Тиихэдэ үшөө Буряадай габьяата зүжэгшэн Лосолма Протасова энэ үдэртэ ерэһэн айлшадые хонгёо һайхан хоолойгоороо угтан абаба.  «Би Шэнэхээн нютагайшье һаа, Буряад оронойб гээд ябадагби», - гэжэ Лосолма хубаалдаба.Буряадай улас түрын багшанарай колледжын багшанар хари гүрэнүүдэй хэдэн зуугаад оюутадые һургажа, хүнэй зэргэ хүн болгоод, наһанай ута харгыда гаргаһан юм. Тэрэ тоодо Хитадай Максим Ма болоно. 2024-2025 онуудта, һаяын хоёр жэлдэ, Москва, Пекин хотонууд соёлой талаар нягта харилсан ажаллаха юм. Энээн тухай тусхай захиралтада Владимир Путин гар табиба. Эрхэ хуулиин мэдээсэлэй сахим хуудаһан дээрэ толилогдоһон данса соо «орос- хитад харилсаануудай саашадаа хүгжэхын, соёлой талаар хоёр талын холбоонуудые үргэдхэхын тула» энэ шиидхэбэри абтаба гэжэ хэлэгдэнэ. Хоёр гүрэнэй хоорондохи гадаадын харилсаа холбооной байгуулагдаһаар, 75 жэлэй ойн тэмдэглэгдэхэеэ байһан мүнөө үедэ энэ ехэ хэмжээнэй түсэл онсо удхатай.