Улаан-Үдэдэ «Новые задачи и перспективы развития растениеводства Республики Бурятия в 2024 году» гэһэн агрономическа зүблөөн үнгэрбэ. Тус зүблөөндэ хүдөө ажахын эмхи зургаануудай хүтэлбэрилэгшэд, аймагуудай толгойлогшод, эрдэм шэнжэлгын эмхинүүдэй түлөөлэгшэд, һалбариин түрүү хүдэлмэрилэгшэд, хүдөө ажахын эд  үйлэдбэрилэгшэд хабаадаба. Уласай Толгойлогшо Алексей Цыденовэй тэмдэглэһээр, Буряад орон алишье шэглэлээр ургаха, хүгжэхэ ёһотой.Урда жэлнүүдтэ орходоо, уласнай үнгэрөөшэ жэлдэ эгээ ехэ ургаса, таряа суглуулһан байна. Байгша ондо энэ шэглэлдэ 500 сая түхэриг, тиихэдэ хабарай тарилгын ажалда 266 сая түхэриг хүдөө ажахын үйлэдбэринүүдтэ эльгээгдэхэ юм. Таряа тарилгын болон бэлдэлгын ажалда дэмжэлтэ мүнгэн болзорһоо урид, апрелиин 1 болотор орохо. Байгша ондо хүдөө ажахын ургамал ургуулдаг эрдэмэй бүхы һалбаринуудта жэлдээ һомологдодог мүнгэнһөө зуунай 36 хубинь эльгээгдэхэ байна. Энэ зүблөөндэ хүдөө ажахын ургамал ургуулдаг зондо Баярай бэшэгүүд барюулагдаа, медальнууд зүүлгэгдэһэн  байна. Тиихэдэ Баргажанай аймагай «Арбижил» гэһэн Хизаарламал харюусалгатай бүлгэмэй дарга Евгений Лубсанов мүн лэ шагналда хүртэбэ. Байгша он хүдөө ажахыда ургаса ургуулха талаар үрэжэлтэй байха гэжэ найдагдана. Юуб гэхэдэ, тарилгын газар зуунай 9, тэжээл бэлдэлгынхи зуунай 28 хубяар нэмэгдэхэ.  Тиихэдэ мартын 22-то үшөө лён болон рапсын тоһо үйлэдбэрилхэ заводууд нээгдэхэ, тиимэһээ энэ ябуулга 20-ёод дахин ехэ болохо байна.