Шогтой хурса үгэнүүдээр арад зониие хүхеэжэ, удаань уйдхартай, гашуудалтай сагтань харагшадай зүрхэ сэдьхэл доһолгожо, зүжэгэй ябасын үедэ элдэб янзын мэдэрэл түрүүлжэ шададаг арадай театрай зүжэгшэд хоёр үдэрэй туршада аймагайнгаа ажаһуугшадые баярлуулба.Хурамхаанай аймагта дүн хамта арадай зургаан театр  бии. Жэлһээ жэлдэ нютагуудай театр бүхэн аятай, гүнзэгы удхатай зүжэг бэлдэжэ, «Театрай хабар» фестивальда дурадхадаг заншалтай. Тиихэдэ Хурамхаанай, Дэрээнэй, Уланхаанай болон Аргатын театрнууд фестивалиин түрүүшын үдэртэ, хоёрдохи үдэртэнь Барханай болон Гааргын арадай театрнууд зүжэгүүдээ дурадхаа. Байгша ондо үнгэржэ байһан «Театральна хабар» фестиваль бүхы наһаараа Барханай арадай театрта хүдэлһэн, олониитын ажал ябуулагша Базар Санхарович Гармаевай 90 жэлэй ойдо зорюулагдаа. Һаяхана манай «Буряад ТВ» телесубаг мэдээжэ зүжэгшэнэй мүнхэ дурасхаалда баримтата кино буулгажа дурадхаһан байна. «Театральна хабар» фестивальда Буряад Уласай дүй дүршэлтэй соёлой мэргэжэлтэд жюриин гэшүүд боложо,  зүжэг бүхэниие сэгнэһэн байна.Тиихэдэ түрүүшын һуурида «Үдэшэ» гэһэн зүжэг бэлдэһэн Барханай арадай театр гараа. Хоёрдохи һуурида Уланхаанай арадай театр, гурбадахи шатын дипломдо Дэрээнэй арадай театр хүртэһэн байна. Дээдын шанда Хурамхаанай арадай театр хүртэбэ. Илагшадта, эрхимлэһэн   зүжэгшэдтэ мүнгэн шангууд барюулагдаа. Гадна зүжэгые эрхимээр шэмэглэһэн, «оршуулга» гэһэн шэглэлдэ шалгарһан хоёр театрнуудта Буряад ТВ субагһаа тусхай мүнгэн шангууд барюулагдаа.