Буряад Уласай Засагай газарта байгаалида гамтайгаар хандаха талаар болбосоролой асуудалаар дүхэриг шэрээ үнгэрбэ. Бүхы дэлхэйн түрүү гүрэнүүдтэ энэ асуудал хурсаар табигдана. Олониитые тогтууритайгаар хүгжөөхэ, оршон  байгаали зандань үлээхэ гэжэ оролдохын тула энэ зорилго шиидхэхэ хэрэгтэй. Буряад Уласай Байгаалиин нөөсэнүүдэй ба байгаали хамгаалгын яаман «Буряад Уласта байгаали хамгаалха, гамтайгаар хандаха болбосорол, гэгээрэл ба оршон тойронхи байгаалиин ариг сэбэр байлгые сахиха мэдэрэл бүридүүлгэ тухай» хууляар олон тоото хэмжээ ябуулгануудые үнгэргэнэ. Һургуулиин урдахи болбосоролһоо эхилээд, хүүгэдые байгаалида гамтайгаар хандаха гуримтай болгохо шухала. Хүүгэдэй сэсэрлигүүдтэ иимэ хүмүүжүүлгэ ябуулха, тэдэнтэй элдэб наада эмхидхэжэ, байгаалида гамтайгаар хандажа һургаха хэрэгтэй гэжэ үгэ хэлэгшэд тэмдэглээ. Үшөө тиихэдэ оюутадай, ниитын эмхинүүдэй энэ хэрэгтэ дүүргэхэ үүргэ тухай эндэ хөөрэлдөө. Бухы орон дотор, мүн Буряад Уласта байгаали хамгаалха талаар хүн зониие һургаха, хүмүүжүүлхэ эхи үндэһэн табигдажа эхилээ гэжэ дүхэриг шэрээдэ хабаадагшад тэмдэглээ.