Театрай уласхоорондын үдэртэ Буряад театрай тайзан дээрэ Буряадай театральна оршоной гол үйлэ хэрэг «Браво – 2024» гэһэн шоу программа үнгэрѳѳ. Тус программын хэмжээндэ театрай фойе соо «Манай тайзанай үзэсхэлэн» болон Буряадай габьяата зүжэгшэн Ада Ошоровагай «Урма зориг» гэһэн нэрэтэй ажалынь дэлгэгдэһэн байна. Заншалта ёһоор энэ үдэртэ зорюулагдан, театрай эрхим ажаябуулагшадта шангууд барюулагдаа. Тиин «Эрэ хүнэй эрхим роль» гэһэн номинацида Борис Васильевай  «А зори здесь тихие» гэһэн туужаар табигдаһан «Үүрэй хираан эндэ аалин-аалин» зүжэг соо старшина Васковой дүрэ шадамараар гүйсэдхэһэнэй түлөө Солбон Субботин шанда хүртэбэ. «Эрхим оперно парти» гэһэн номинацида Баир Дондоковой «Эреэхэн» гэжэ үндэһэн оперодо Эреэхэнэй парти гүйсэдхэһэн Билигма Ринчинова илагша болобо. «Эхэнэрэй эрхим роль» гэжэ номинацида  Анна Натансон, «Найруулан табигшын эрхим хүдэлмэри» номинацида Эрдэни Жалцанов шалгараа. Мельпоменэдэ алба хэгшэдтэ бүхыдѳѳ арбан номинацинуудаар шангууд барюулагдаа, харин тэдэ мэргэжэлтэ һайндэрөөрөө бэе бэеэ дуу, хатараар амаршалбад. «Браво» гэһэн шоу манай уласта эгээл һонин, гоё хэмжээ ябуулгануудай нэгэн болоно.