Байгал далай сахин хамгаалха, экологическа байдал hайжаруулха асуудал шухала зандаа. Үнгэрѳѳшэ амаралтын үдэрнүүдтэ Кабанскын аймагта омолиин түрьһэн табигдаба. Большая Речка горхон уһаяа намнажа, Байгал далайда ородог. Тиимэһээ тэндэ түрьһэн олоор табигдажа, ехэ далай руу оруулгын ажал жэл бүри эмхидхэгдэжэ байдаг юм. Тус хэмжээ ябуулгада Занна Воронова жэлһээ жэлдэ аргагүй харюусалгатайгаар хандадаг, тиимэһээ энэ хэжэ байһан үйлэ хэрэг ехэ шухала гэжэ тэрэ тэмдэглэнэ.

Гансал Байгал далайда амидардаг омоли загаһанай үсөөн болоһон ушарһаа 2017 оной октябриин 1-һээ тэрэниие олзоборилхонь хуулиин ёһоор хоригдоһон юм. Харин энэ загаһа олошоруулха зорилготой ажалай дүн мүнѳѳ харагдажа байна. 2023 онһоо уластамнай хүсэһэн зондо омоли барилга һѳѳргѳѳ зүбшѳѳлтэй болобо гэжэ уласай толгойлогшо дуулгаа.
Кабанскын аймагта Байгалай омоли үсхэбэрилдэг Большереченскэ завод аяар 1933 онһоо ажалаа ябуулна. Мүнѳѳ жэлдэ тэрэниие һэльбэн шэнэдхэлгын хэмжээ ябуулганууд үнгэргэгдэнэ. Шэнэлэгдэһэн завод омолиин түрьһэ хоёр дахин олошоруулха – 500 саяһаа 1млрд 250 млн хүрэтэр гэжэ түсэблѳѳтэй.