1937 ондо Зүблэлтэ засагай хатуу үе сагта гүрэн дотор олон һүмэ, дасангууд хаагдаһан, һандаргагдаһан юм. Тэрэ тоодо Үбэр-Байгалай хизаарай эгээн томо һүмэ – Хяагта хотын Гэгээн-Троицкын һүмэ – хаагдаһан юм. Хэдэн жэл соо досоонь музей, эмхи зургаанууд ажаллаһан, Фуко гэжэ дүүжэн сахариг табигдаһан байдаг. 1960-аад онуудта досоо, газаа талань түймэртэ шатаа, һүүлээрнь һүмэтэй зэргэлээд  хотын түбэй амаралгын сэсэрлиг байгуулагдаа бэлэй. 1997 ондо һүмэ Оросой церковьтэ бусаагдаһан, тэрэ гэһэн сагһаа хойшо һүмэ һэльбэн шэнэлхын ажал ябуулагдана. Һэльбэн шэнэдхэлгэ 2018 ондо федеральна программаар эхилһэн аад, 2020 ондо түсэл буруу зохёогдоһонһоо боложо, ажалынь тогтоһон байна. Һүмэ анханай түхэлтэй болгохын тула ехэхэн ажал хэгдэхэ байна. Хана, үһээ, хушалта, һүмын орой шэнэлгэ, досоо талыень заһалга, гоёолто гэхэ мэтэ ажалнууд хэгдэхээр хараалагдана. Совет үедэ һандаргагдаһан, бута сохигдоһон һүмэ, дасангууд һүүлшын үедэ гүрэн дотор һэргээгдэжэ эхилэнхэй.  Иимэ ажал хүн зоной досоо һүзэг түрүүлдэг, мүн лэ тиихэдэ түүхэмнай һэргэнэгээшэ ааб даа гэхэдэ, алдуу болохогүй.