Һээр шаалга Буряадай ниислэлдэ 2 үдэр үргэлжэлбэ. Тэрэниие һэргээлгэ Түнхэнэй аймагһаа эхи абажа, үшөө 2013 ондо Түнхэндэ түрүүшынхиеэ үнгэрһэн байна. Тэрээнһээ хойшо «Алтан мундарга» фестиваль үндэр хэмжээндэ үнгэргэгдэжэ, олон хабаадагшадтай болон харагшадтай болонхой. Буряад Уласай бүхы аймагуудһаа, Оросой можонуудһаа болон хүршэ Хитад болон Монгол оронуудһаа хабаадагшад тус мүрысөөнэй абаргын нэрэ зэргэдэ хүртэхэ зорилготой зорижо ерээ. Бүхыдөө 500 гаран һээр шаагшад хабаадаа.«Алтан мундарга» мүрысөөндэ эрэшүүлэй дунда илагша 1 сая хахад түхэригтэ, тиихэдэ эхэнэрнүүдэй дунда илагша Тайланд гүрэн ошожо амарха путёвкада хүртэхэ ёһотой байгаа.Тиин энэ путевкада Монголой хабаадагша Мүнх-Туяа хүртэбэ. Энэ мүрысөөндэ гансал Захааминай аймагһаа 210 һээр шаагшад ерэһэн байна, тэдэнэй дундаһаа Амур Гончиков мүрысөөнэй абарга боложо тодороо. Тэрэ Монголой тамиршан Цогбадрах Чингуунтай ана-мана тэмсэбэ.
