Уласхоорондын номой үдэр Намжил Нимбуевай нэрэмжэтэ номой санда залуу уран зохёолшо Петр Хараевай «Гэсэр» үльгэрэй шэнэ янзатай танилсалга үнгэрбэ. Буряадай үльгэршэн байһан үбгэ эсэгынь дээрэһээ эльгээһэн бэлгэ тэмдэг, 15 жэлэй шэнжэлэлгэнүүд, 2 жэл үргэлжэлһэн ажал – энэ бүгэдын үрэ дүн гэбэл, мэдээжэ үльгэрэй шэнэ янзын 10 хуби бэлэн болобо. Оршон сагай эрхэ байдалда заншалта соёл ба түрэлхи хэлэ сахин хүгжөөхэ, саашань дамжуулха хэрэгтэ Гэсэр үльгэрэй үүргэ илангаяа уран зураашад, уран зохёолшод болон эрдэмтэдтэ аргагүй шухала. Номойнгоо уран шэмэглэлые Петр өөрөө бүтээнэ, тиимэһээ үльгэрэй хуби бүхэн зурагуудай бэлэн болоходол хэблэгдэжэ гараха юм. Энээнһээ гадуур, Эржена Доржиевагай буряад хэлээр упражненинүүдэй согсолборитой танилсуулга болобо. Тус хэмжээ ябуулга эмхидхэһэн «Этнопланета» гэһэн  Бэеэ дааһан, аралжаанай бэшэ, соёлой түбэй гол зорилго хадаа түрэлхи хэлэ, буряад арадай ёһо заншалнуудые сахин хүгжөөлгэ болоно.  Ном хадаа дэлхэйн элдэб хубинуудта ажаһуудаг хүнүүдые дүтэ болгодог, өөрыгөө ба тойроод байһан хүнүүдые һайнаар ойлгоходо туһалдаг, бодото ажабайдалай болон һанаанһаа абажа зохёогдоһон зүйлнүүдэй хоорондо холбоо байгуулдаг гээшэ.