Хүүхэлдэйн «Үльгэр» театр уласай багашуулай болон эдиршүүлэй номой сантай хамта түрэһөөр 100 жэлыень олониитэ зоной тэмдэглэжэ байһан мэдээжэ уран зохёолшо Гунга Чимитовэй зохёохы ажалда зорюулһан викторинэ, номуудай үзэсхэлэн дэлгэбэ. Тиихэдэ эдир харагшадта «Урма зоригой Далай» гэһэн зүжэг харуулаа. Энэ зүжэгтэ Гунга Чимитовэй дүрэ харуулһан Далай үбгэн гол герой болоно. Тэндэ уран зохёолшын шүлэгүүдшье зэдэлээ, үхибүүд ехэ урмашан зүжэг хараа. Оршон үеын үхибүүдтэ иимэ зүжэгүүдые дурадхажа, тэдэниие таарамжатай, зохид һанал бодолтой болгоходо, түрэл хэлэниинь хүгжэнэ  гэжэ һанахада, тон һайшаалтай байна. Тиимэһээ энэ хэмжээ ябуулга ехэ удхатай гэжэ тэмдэглэмээр. Энэ хадаа хэдэн зуун жэлдэ суглуулһан арадай аман зохёол мартагдангүй, үеһөө үедэ дамжуулагдажа байха ёһотой гэһэн удхатай зүжэг болоно. Хүмүүжэмэлнүүдтээ буряад хэлэнэйнгээ һайханиие, арадай аман зохёол шадамар бэрхээр дамжуулжа шадаһан хүн, ехэ бэрхэ һурган хүмүүжүүлэгшэ  байһан гэжэ Гунга Чимитов тухай хэлэмээр. Гунга Чимитов Мухар-Шэбэрэй аймагай Хушуун-Үзүүр нютагта түрэһэн. Уласай композиторнуудтай хамта Гунга Чимитов хоёр зуугаад гаран дуу бэшэһэн юм. «Эгэшэ аха хоёрни», «Инаг дураяа гамнаарай», «Тоонто нютаг» гэһэн дуунуудынь илангаяа үргэнөөр дэлгэрэнхэй.