Тэдэнэр хүүгэдые буряад хэлэндэ һургадаг, түрэл арадайнь соёлтой танилсуулдаг гээшэ. Улаан-Үдэдэ «Эрхим хүмүүжүүлэгшэ» гэһэн мүрысөөн боложо дүүрэбэ. Тэрэнэй хэмжээндэ хүүгэдэй сэсэрлигүүдтэ буряад хэлэ заадаг эрхим багшанар болон хүмүүжүүлэгшэд элирүүлэгдээ.
Багшанар болон хүмүүжүүлэгшэд 3 үдэрэй туршада хүүгэдые буряад хэлэндэ һургаха талаар тус тустаа өөрынгөө хэрэглэдэг онол аргануудые харуулба. Мүрысөөнэй дүнгүүдээр  «Дашенька» гэһэн 111-дэхи хүүгэдэй сэсэрлигэй багша Евгения Бадмаева эрхимлэжэ, Дээдын шанда хүртэбэ. Энэ багша түрэлхи хэлэ шудалха талаар туһатай наада зохёоһон байна.«Алые паруса» гэһэн 35-дахи хүүгэдэй сэсэрлигэй багша Людмила Бальжурова 1-дэхи һуурида гараа, тэрэ буряад хэлэн дээрэ мультфильм буулгаһан байна. Мүрысөөндэ эрхимжэ гарагшад,  шангуудта хүртэгшэд  тус мүрысөөнэй уласай шатада Улаан-Үдэ хотоёо түлөөлхэ болоно. Хотын конкурсын дүнгүүдээр, шагналга Улаан-Үдын Захиргаанай дэргэдэхи буряад хэлэнэй талаар комиссиин  зүблөөнэй хэмжээндэ үнгэрөө. Эндэ түрэлхи хэлэ сахин хүгжөөхэ талаар түсэлнүүд зүбшэн хэлсэгдээ.