Апрелиин 1-дэ жэл бүри Буряадай багшанарай колледж руу айлшад олоор ерэдэг. Ушар юуб гэхэдэ, энэ үдэртэ уран һайханай-зурагай таһаг дүүргэгшэд түрэл колледж руугаа ерэжэ, бэе бэетэеэ, багшанартаяа уулзадаг заншалтай. Энэ жэлдэ уран һайханай-зурагай таһаг дүүргэгшэдэй 55-дахи ойн баярай уулзалга болоно. Энэ хугаса соо тус таһаг хэдэн олон оюутад дүүргэжэ гараһан, мүнөө дээрээ тэдэнэй зариманиинь мэдээжэ уран зураашад, уран барималшад, дарганаршье болонхой. Мүнөө үедэ уран һайханай-зурагай таһагта һуража байһан оюутад аха захатандаа гоё гэгшын тоглолто бэлдэбэ. Энэ уулзалга хадаа Буряадай багшанарай колледжын 100 жэлэйн ойн баярай хэмжэндээ үнгэрбэ.
