Уласай түбэй номой hанда  мэдээжэ буряад уран зохёолшо Дашарабдан Батожабайн хүшөөгэй дэргэдэ “Буряад уянга-ородоор” гэhэн уран зохёолшодой мүрысөөн үнгэрбэ. Уран зохёолшод болон бусадшье бэшэхэ дуратай зон шүлэгүүдые буряад хэлэнhээ орон хэлэн дээрэ оршуулhан байна.

Энэ мүрысөөн хадаа Буряадай оршуулагшадай  холбооной үүсхэлээр үнгэрhэн байна. Юрий болон Юлия Ковычевуудай бүлэ энэ хэмжээ ябуулгада дуугаа дуулаа,  тиихэдэ дуушан Вера Шобосоева уран зохёолшо Сергей Доржиевай “Гансал шамдаа” гэhэн шүлэгые  дуун болгожо, мүн лэ гүйсэдхэһэн байна.

Үнэхөөрөөшье,  буряад хэлэмнай тон баян гээшэ. Уран зохёол уншахада, тэрэ ехэ гүнзэгы удхатай боложо үгэдэг. «Буряад уянга-ородоор» гэhэн мүрысөөндэ Григорьева Татьяна мэдээжэ поэт Дондог  Улзытуевай “Буряад хэлэн” гэhэн шүлэг оршуулжа, 1-дэхи  hуури эзэлhэн байна. Энэ хэмжээ ябуулга Буряад Уласай 100 жэлдэ зорюулагдаа.