Мүнөөдэр Эсэгэ ороноо хамгаалгын Агууехэ дайнай жэлнүүдтэ алуулһан, тиихэдэ амиды мэндэ энэ үдэр хүрэжэ ерэээгүй хүнүүдэй дурасхаалда Илалтын Хүшөөгэй дэргэдэ “Дурасхаалай зула” гэһэн хэмжээ ябуулга үнгэрбэ.
Июниин 22-то Оросой Холбоондо дурасхаалай болон гашуудалай үдэр тэмдэглэгдэдэг – 1941 оной энэл үдэр фашис Германи Совет гүрэндэ ямаршье дай соносхонгүй добтолжо ороо бэлэй. Түмэр зам, агаарай онгосонуудай буудалнууд, хото, һуурин тосхонууд, заводууд, фабриканууд хайра гамгүй бомбодолгодо ороо.
Энэ ехэ дайн 1 418 хоног үргэлжэлөө, 1945 оной майн 9-дэ илалтаар дүүрээ һэн. СССР гүрэнэй 27 миллион хүнүүд алуулһан гэдэг. Тэрэ тоодо сэрэгэй алба хэжэ байгшад, юрын эрхэтэд, баряанда абтагшад.
Энэ үдэр манай орондо эгээл гашуудалтай үдэр юм. Тиибэшье энэ үдэр бүхы дэлхэй арад түмэниие фашис дарлалтаһаа сүлөөлэлгын эхин болоһон гэжэ тоологдодог. Эгээл эндэ “Хэншье мартагдаагүй, юуншье мартагдаагүй” гэһэн уряае мартамаар бэшэл даа.
