Улаан-Үдэ хотын һунгамалнуудай зүблэлэй ээлжээтэ 49-дэхи сесси үнгэрбэ. Сессиин эхиндэ Улаан-Үдэдэ «Ажалай шэн габьяагай хото» гэһэн нэрэ зэргэ олгохо тухай зарлигтай дурасхаалай самбар Улаан-Үдэ хотын захиргаанай танхим соо нээгдээ. Шэнэ хүшөөтэй зэргэлээд, Буряадай ниислэл хотые 1984 ондо Ажалай Улаан Тугай орденоор шагнаһан тухай баталамжа үлгэгдэнхэй. Эээлжээтэ сессидэ һунгамалнууд 6 асуудал зүбшэн хэлсэбэ. Тэдэнэй дунда «Улаан-Үдэ хотын захиргаанай байгууламжа тухай» болон «Улаан-Үдэ хотын захиргаан тухай Дүрим баталалга тухай" гэһэн эгээл шухала шиидхэбэринүүдтэ хубилалтанууд оруулагдаа. Шэнэ байгууламжын ёһоор, Улаан-Үдэ хототой ниилэһэн һууринуудай оршон тойронхиие үргэлжэдэнь хүгжөөхэ түсэб хотын захиргаанай толгойлогшын нэгэдэхи орлогшо Олег Екимовский харгалзалан хутэлхэ болобо. Хотын ажахын хорооной түрүүлэгшэ Сергей Гашев түб хотын захиргаанай Толгойлогшын үшѳѳ нэгэн нэгэдэхи орлогшын уялга дүүргэхэ. Тэрэ хотын оршон байгуулгые болон амидарал хангалгын байгуулга хүгжөөхэ ажалай түлөө харюусалга дааха болоно. Үшѳѳ тиихэдэ һунгуулиин нэгэ мандатна тойрогуудай хэб зураг баталалга тухай асуудал шиидхэгдэбэ. Шэнэ хэб зурагаар тойрог бүхэндэ 9 мянганһаа 10 хахад болотор ажаһуугшад тоологдохо болоно. Һүүлшын асуудалнуудай нэгэн гэхэдэ, 2024 ондо һунгагшадай захяанууд. Байгша ондо 348 захяа дүүргэхэ түсэлнүүдтэ 120 сая түхэриг һомологдобо. Тэрэнь һунгуулиин тойрог бүхэндэ 4 сая түхэриг болоно. Гадна Улаан-Үдэ хотын зүблэлэй һунгамалнуудые Хүндэлэлэй грамотаар шагнаха тухай шиидхэбэри мүн лэ абтаа. Һунгамалнуудай Зүблэлэй түрүүлэгшэ Чимит Бальжинимаевай тэмдэглэһээр, һунгамалнууд үрэ дүнтэйгөөр хүдэлөө. Сесси дээрэ харагдаһан 6 асуудалнууд хороон бүхэндэ урид хэлсэгдэһэн дээрэһээ богони болзор соо шиидхэгдэһэн байна.
