Һунгалтын газарта эртэ үглөөнһөө хойшо зон олоор  сугларанхай, ерээдүй байдалай түлөө һунгаха дуратан элбэг. Юрэ арадай үндэһэн хубсаһа үмдэһэн, хүхюутэй зон олоной анхарал татана. Буряадта ажаһуудаг элдэб яһатанай түлөөлэгшэд эбтэйгээр сугларан, Гүрэнэй Юрэнхылэгшые  һунгалтада ерэжэ хабаадаба.Татар, казах, солонгос, узбек, таджик, армян, эвенк арадуудай Хани барисаанай байшангай хамаатад өөһэд өөһэдынгөө гэр байрада дүтэ һунгуулиин газарта ошожо һунгабад. Буряад Уласта 130 гаран элдэб яһатан ажаһууна. Арад бүхэн гүрэнэй хэмжээнэй гү, али буряадайшье, үгышье гэбэл өөһэдын үндэһэн һайндэрнүүдтэ булта нэгэдэжэ, нютаг нютагайнгаа онсо маяг, ёһо заншал болон үндэһэн хоолтой танилсуулдаг. «Ород гүрэнэй арадуудай ассамблея" гэһэн Бүхэроссиин ниитын-гүрэнэй эмхиин түлөөлэгшэд плов, чак-чак, бауырсак, гэбэшье элдэб жэмэсээр бэлдэгдэһэн үндэһэн хоолоор һунгуулиин газарай ниитын адаглалай штабта ажаллажа байһан зониие хүндэлөө. Гүрэнэй ба улас түрын хэмжээ ябуулгануудта арад бүхэн өөрын онсо нүлөө оруулжа, арад бүхэнэй хоорондо эб найрамдал дэлгэржэ, Буряадтаа эбтэй ажаһуухамнай дамжаггүй даа.