Бэлигтэй хүнүүд – миин хүнүүд бэшэ, дээдын оюун бэлигтэ ухаанай түлөөлэгшэд ха юм даа. Буряад оромнай иимэ зоноор тон баян гээшэ. Тиихэдэ ямар нэгэн үйлэ хэрэгээр зариманай нэрэ суурхаагүй, олондо мэдэгдэнгүй үлэшэдэг. «Хүнэй нэрэ һэргээхэ» гэһэн түсэлэй хэмжээндэ тэдэнэй нэгэн, элитэ уран зурааша Борис Бадмажаповай «Уран зураг – наһанайм хэшэг» гэһэн нэрэтэй дурасхаалай үдэшэ Улаан-Үдэ хотын И.Калашниковай нэрэмжэтэ номой санда үнгэрбэ.Борис Бадмажапов Агын тойрогой Урда-Ага нютагта түрэһэн юм. Бүхы наһаараа тэрэ урлалай үргэн харгыгаар батаар алхалха, өөрынгөө шабинарые ажабайдалай харгыгаар дахуулха хуби заяатай, уран зурагай оньһон нюусануудые  абажа, хадагалжа ябаһан хүн. Хүмүүжүүлһэн абьяас бэлигтэй шабинарынь мүнөө наһанайнь хэрэгые  найдамтайгаар үргэлжэлүүлнэ.  Тус үзэсхэлэнэй нээлгэдэ уран зураашын түрэлхид, уласай багшанарай дунда мэргэжэлэй һургуулиин оюутад болон мэдээжэ уран зураашад ерэжэ, уран һайханай  үзэсхэлэнтэй танилсажа, Борис Бадмажапов тухай ехэ  дулааханаар дурсабад. Эрхим шударгы ажал, үндэр уран бэлигээ Эхэ орондоо, түрэл арадтаа зорюулһан бүтээлнүүдээ саашанхи үенүүдтэ үлээһэн гүн ухаата Борис Бадмажаповай нэрэ Буряад ороной уран һайханай түүхэдэ хэтэдээ үлэхэнь дамжаггүй.