Буряад ороноймнай хүдөө аймагуудаар сүлөөгүй хаһа тогтонхой. Зунай ажалнууд түлэг дундаа ябаһаар. Гэбэшье гүрэнэй шухала һалбаринуудай нэгэн – Хүдөө ажахы ба эдеэ хоол. Тус һалбариин мэргэжэлтэдые бэлдэжэ һургаха гээшэ  бэлэн хэрэг бэшэ. Жэлһээ жэлдэ шэнэ эрилтэнүүд, шэнэ оньһон түхеэрэлгэнүүд бии боложол байна ха юм. Буряадай Хүдөө ажахын академидэ хүдөө ажахын дээдэ һургуулинуудай һуралсалай талаар захиралай орлогшонорой «Оросой хүдөө ажахын дээдэ һургуулинуудта болбосоролой бодолго: мүнөө үеын байдал болон ерээдүй» гэһэн сэдэбээр Бүхэоросой семинар- суглаан үнгэргэгдэбэ.Энэ хэмжээ ябуулгада Оросой Хүдөө ажахын яаманай, агропромышленна комплексын ба загаһа үсхэбэрилгын  һалбариин болбосоролой эмхи зургаануудай эблэлэй, Оросой Болбосоролой болон эрдэм ухаанай яаманай, Оросой урьһаламжын агентствын, агропромышленна комплексын мэргэжэлэй шадабариин талаар зүблэлэй, «Хүдөө ажахы ба хүдөө ажахын эрдэмүүд» гэһэн болбосоролой һалбариин талаар залан хүтэлбэриин зүблэлэй түлөөлэгшэд, һуралсалай хүдэлмэриин талаар захиралай орлогшонор хабаадаба.  Һуралсалай 40-өөд эмхи зургаанай түлөөлэгшэд гурбан үдэрэй туршада Оросой Холбоондо дээдэ болбосоролые нарижуулан һайжаруулгын гол шэглэлнүүд, мүнөө үеын болбосоролой программанууд, дээдэ һургуулинуудта тоо оньһо нэбтэрүүлгэ, агроклассууд, ажалаар хангалга тухай асуудалнуудые зүбшэн хэлсэхэ юм. Академиин эрдэм ухаанай-болбосоролой  ба ниигэмэй-соёлой эрхэ байдалтай танилсалга тус хэмжээ ябуулгын программа соо хараалагдана.