Июниин 27-до Буряад ороной хуули зохёодог зургаанай ээлжээтэ зүблөөн үнгэрбэ. Энэ удаа Арадай Хуралда 36 асуудал зүбшэн хэлсэгдээ, тэдэнэй 29-иинь – хуулиин түсэлнүүд, 7-иинь – захирамжанууд. Тус зүблөө уласай түрын засагай түлөөлэлгэтэ зургаанай  хүтэлбэрилэгшэ Владимир Павлов хүтэлөө, зүблөөнэй хүдэлмэридэ Буряад Уласай Толгойлогшо Алексей Цыденов хабаадааа. Тэрэ хадаа Буряад Уласай Засагай газарай 2023 оной ажаябуулгын дүнгүүд тухай хөөрөө.  Июниин сессиин шухала асуудалнуудай нэгэн гэбэл, 2023 оной уласай бюджет гүйсэдхэлгэ тухай тоосоон ба 2024 оной бюджедтэ хубилалтануудые оруулга болоно. Засагай газар, Уласай Толгойлогшо ба Арадай Хуралай һунгамалнууд уласай мүнгэн һангай гол баримта саарһанда нэмэлтэ хубилалтануудые оруулаа.Үшөө тиихэдэ энэ сесси дээрэ һунгамалнууд гүрэнэй ба газар дэбисхэрэй байгуулгада, ниигэмэй һалбарида, уласай дэбисхэр дээрэ архиин зүйлнүүдэй эрьесэдэ хабаатай асуудалнуудые зүбшэн хэлсэбэ. Гэбэшье «Буряад Уласта нютагай засагай байгууламжануудай өөһэдын хүтэлбэриин зургаануудай уласхоорондын ба гадаадын эдэй засагай  харилсаануудые бэелүүлгэ тухай» хуулиин түсэл һунгамалнуудай һонирхол татаһан байна. Энэ хуулиин ёһоор, нютагай засагай байгууламжануудай зургаанууд уласхоорондын эрхэ түлөөлгэнүүдтэй болохо байна.