Буряад хэлэнэй габшагай һарада дашарамдуулан Исай Калашниковай нэрэмжэтэ хотын түбэй номой санда заншалта «Эрхим диктант» гэһэн хэмжээ ябуулга үнгэрбэ. Байгша ондо Буряадай мэдээжэ уран зохёолшо Исай Калашниковай түрэһэѳѳр 95 жэл гүйсэбэ. Энэ ушараар тус диктантын текст уран зохёолшоной «Намаг соогуур» гэһэн туужа сооһоо абтаа.

«Эрхим диктант» гэһэн хэмжээ ябуулгада 40 гаран хотын ажаһуугшад хабаадажа, буряад хэлэнэйнгээ мэдэсэ шалгаба. Тэдэнэй дунда үндэр наһатайшуулшье, залуушуулшье байгаа.

Эмхидхэгшэдэй тэмдэглэһээр, жэлһээ жэлдэ түрэл хэлэеэ һайн мэдэхэ зон олошорно. Түрэл буряад хэлэеэ сахин хүгжөөхэ, дэлгэрүүлхэ болон соёл түүхэдээ һонирхол түрүүлхэ зорилготойгоор диктант бэшэлгэ эмхидхэгдэнэ.