Ирагуу һайхан дуу хүгжэм Бутит эжыдээ Дарима басаганиинь зорюулба. Октябриин 1-дэ Жамсарановтанай гэртэ заабол олон айлшад суглардаг. Бутит эгэшэ мүнөө жэл 103-дахи жэлэйнгээ дабаан дээрэ ябана.  

Бутит Жамсаранова ажалай ветеран нэрэ зэргэтэй. Дайнай хатуу жэлнүүд соогуур, мүн һүүлээрхи үедэ тэрэ балшар наһанһаа хара ажал хэжэ, орон нютагайнгаа хүгжэлтэдэ хубитаяа оруулһан юм. Юһэн үри хүүгэдые түрэжэ, хүлыень дүрөөдэ, гарыень ганзагада хүргэжэ, «Эхын алдар» орденой гурбадахи шатын кавалер болоһон юм.

Бууралһаа үгэ дуулаха, халуунһаа ама хүрэхэ гэһэн ёһо заншалаа сахин, Бутит эгэшэдэ айлшад баглаа сэсэг, баярай бэшэг ба гарай бэлэгүүдые барюулба. Агын тойрогто мүнөө дээрээ 100 жэлэй ой угтаад байһан табан ахатан амгалан ажаһууна гээд наһажаал зоной зүблэлэй түрүүлэгшэ Любовь Ширибазарова тодорхойлно. Һайндэрэй үдэр тэдэ бүгэдые бултыень амаршалба.