Сентябриин 25-26-най үдэрнүүдтэ Хурамхаанда шэрээгэй теннисээр «Курумкан Open» гэһэн уласай мүрысөөн үнгэрбэ. Улаан-Үдэ хотын болон уласай аймагуудһаа эгээл шанга 134 хабаадагшад илалтын түлөө  тэмсэбэ. Арбан нэгэн спортын мастернуудай хабаадалга тус мүрысѳѳндэ үндэр хэмжээ олгоһон байна.
 

Олзын хэрэг эрхилэгшэ Станислав Гармаев «Барис» хамжаанай захирал Вячеслав Аюшиев хоёр тус мүрысѳѳ эмхидхэхэдээ, тамирай энэ янзые нютаг дээрэ дэмжэнэ гээшэ. Вячеслав Дашиевич мүрысѳѳнэй үедэ теннисэй 6 шэрээ бэлэглээ, харин энээнһээ урид үшѳѳ 6 шэрээ бэлэглэһэн байна.

Тэрэнэй хажуугаар мүрысѳѳнэй хэмжээндэ Баргажан голой ажаһуугшадта шууд-теннисээр амяараа мүрысөөнүүд эмхидхэгдэһэн байна. Буддын шажанай заншалта Сангхын дид хамба лама Дагба Очиров энэ мүрысөө үүсхэжэ, илагшадые баһал амаршалаа.

 Тус мүрысөөнэй үедэ ёһотойл дулаан, эбтэй оршон байдал тогтобо. Айлшад бэе бэетэеэ мүрысэхэ, харилсахаһаа гадна, аймагай гайхамшаг һайхан байгаали һайхашаан һонирхоо.