Гуша һайса гаратараа, түрэл буряад хэлэн дээрээ яридаггүй байhан Сергей Санхядов мүнөө «Тодо буряад хэлэн» гэhэн түсэл дээрэ дүрбэн жэлэй туршада ажаллажа, тэрэниие хүтэлбэрилжэ ябана. Тэрэ буряад хэлэндэ орохын тула өөрын үзэхэ болон зааха онол арга бэелүүлжэ, тэрэнээ мүнөө буряад хэлэ эхинһээ үзэжэ байhан дуратайшуулда дамжуулжа захалаа.
Буряад хэлэнэй багшанар гүрэнэй программа сахижа, сэсэрлигүүд болон эхин ангинуудта заадаг гээшэ ааб даа. Гэбэшье тус программын ашаар хүүгэд буряад хэлэндэ бэлээр ороодшье үгэдэггүй. Тиимэhээ эхин шатаһаа буряад хэлэндэ һургаха зорилготой мүнөө ехэнхидээ ехэшүүлдэ заажа байhан Сергей багшын зааха онол аргын хэшээлдэ буряад хэлэнэй багшанар сугларба.
«Тодо буряад хэлэн» гэhэн түсэлэй hургуулида алишье hалбариин элдэб наhанай зон ерэжэ, буряад хэлэнэй оньhотой танилсана. Юуб гэхэдэ Сергей Санхядовай хэшээлнүүд юрын hургуулиин программаhаа онсо илгаатай. Жэшээлбэл, хэлэнэй дүримүүдые буряадай соёл болон ажабайдалтай нягтаар холбоод, зарим хэлэнүүдтэй зэргэсүүлэн, үгын удха бүхэниие тодоор тайлбарилжа үгэдэг юм.
