Буряадай ниислэл руу анха түрүүшынхиеэ Хальмаг Уласай Хүүхэлдэйн «Джангар» театр айлшаар буухаяа байна. Тиимэhээ сэсэрлигэй болон hургуулиин үхибүүд, гадна ехэшүүл сентябриин 29-hөө октябриин 2 болотор, аха дүү хальмаг арадай соёлтой дүтөөр танилсажа, шэнэ зүжэгүүдтэй танилсаха аргатай байха.

 Байгша оной апрель hарада Буряадай Хүүхэлдэйн «Үльгэр» театр Хальмаг Улас, Элиста хото руу зүжэгүүдтэеэ  айлшалжа, олоной дура буляажа ерээ һэн. Тиигэжэ мүнөө Хальмаг Уласай Гүрэнэй Хүүхэлдэйн «Джангар» театр манай улас руу баhал айлшалхань. Иимэ арга гүрэн дотор «Большие гастроли» гэhэн Оросой Соёлой яаманай түсэлэй ашаар бэелүүлэгдэнэ.