Ярууна нютагһаа гарбалтай мэдээжэ эрдэмтэн, драматург, ирагуу найрагша Ширап-Нимбу Ринчинович Цыденжаповай 80 наhанай ойн баярта зорюулагдажа, Буряадай улас түрын болбосоролой бодолгын дээдэ һургуулиин байшанда буряад хэлэн болон уран зохёолой багшанарай мастер-класс үнгэрбэ.

Энэ хэмжээ ябуулгада уласаймнай аймагуудай болон хотын һургуулинуудай багшанар дүй дүршэлөөрөө хубалдахаяа ерэһэн байна. Тиихэдэ Яруунын аймагай Мужыхын дунда һургуулиин буряад хэлэн болон уран зохёолой багша Дарима Солбоновна Ганжурова зохёолшын намтар тухай һонирхолтойгоор хөөрэжэ үгэһэн байна.

Үшөө тиихэдэ эндэ һургуулида ороогүй хүүгэд Эсэгэ ороноо хайрлаха сэдьхэлтэй шүлэгүүдые уран гоёор уншажа үгөө.

Энэ хэмжээ ябуулгада багшанар хэшээлнүүдтээ ѳѳрын онсо онол аргануудые, шэнэ үеын оньһон түхеэрэлгэнүүдые, элдэб арга боломжонуудые хэрэглэжэ, хүмүүжүүлгын талаар суг ажалтанда заатагүй баримталжа ябадаг тухай хөөрэжэ үгөө.