Үбэр-Байгалай хизаарай дэбисхэртэ Буряад ТВ телесубаг ажалаа ябуулжа эхилхэнь. Агын Буряадай тойрогой түб Ага тосхондо субагай таһаг нээгдэбэ. Баяр ёһолол үндэр хэмжээндэ үнгэрөө.
Сурбалжалагшад ерэһэн айлшадаа байшандаа халуунаар угтан абаба, телесубагай хүтэлбэрилэгшэ Виталий Раднаев экскурси хэжэ, субагайнгаа түүхэ тобшохоноор хөөрэжэ үгөө. Буряад Уласай толгойлогшо Алексей Цыденовэй үүсхэлээр, 2021 оной майн 30-да буряад хэлэн дээрэ дамжуулгануудые харуулдаг түрүүшын телесубаг байгуулагдажа, олоной һонорто дурдахагдаа һэн гээд һануулая.
2022 онһоо хойшо Үбэр-Байгалай хизаар дотор субагай таһаг байгуулха тухай ажал ябуулагдажа эхилһэн юм. 2023 оной үбэл телесубагай дамжуулганууд хизаар дотор кабельна түхэлэй телевиденидэ гаража эхилээ. Тэрэл үедэ тусхай хэлсээн баталагдажа, Ага тосхондо түлөөлһэн эмхи нээхэ тухай ябуулга хэгдэжэ эхилээ бэлэй. Үбэр-Байгалай хизаарай толгойлогшо Александр Осиповой дэмжэлтээр мүнгэн һомологдожо, жэлэй хугасаа соо телесубагай байшан заһабарилагдаа, тусхай хэрэгсэлнүүд абтагдаа.
Буряад ТВ субагай Агын таһаг теледамжуулгануудые буулгаха оршон үеын хэргэсэлнүүдээр хангагдаатай, студи, мэдээсэлэй, хэлсээнэй таһалганууд, сурбалжалагшадай ажаллаха газар зохёогдоотой. Энэ таһаг тойрог ба хизаар дотороо мэдээжэ сурбалжалагша Сэсэг Сономова хүтэлхэ байна.
Буряад хэлэеэ хүгжөөхэ, угаараа дамжан ерэһэн соёлоо, ёһо заншалаа ерээдүй халаанда дамжуулха хэрэгтэ Буряад ТВ субагай мэргэжэлтэд ехэхэн хубита оруулжа эхилээ гээд айлшад тэмдэглээ. Үбэр-Байгалһаа, Агын тойрогһоо һонирхолтой элдэб түхэлэй дамжуулганууд һаяын үедэ бүтээгдэжэ, олондо дурадхагдаха.
