Ноябриин 15-да П.И. Чайковскийн нэрэмжэтэ урлалай колледжын тайзан дээрэ Гунга Чимитовэй түрэһөөр, 100 жэлэй ойдо зорюулагдаһан, «Дүрбэн тэнгэри» гэһэн  можохоорондын 12-дохи уран уншалгын мүрысөөн   үнгэрөө.

Ирагуу найрагшадай мүрысөөндэ Буряад Уласай дээдэ һургуулинуудай оюутад, һургуулиин һурагшад, шүлэгөөр һонирходог ехэшүүлшье хабаадажа, олоной урда уран гоёор, хүнэй сэдьхэл хүдэлгэмөөр шүлэгүүдые уншаа.

Энэ хэмжээ ябуулгада эдиршүүл поэдэй олохон  зохёолнуудтай танилсахаһаа гадна, өөһэдынгөө зохёожо туршаһан шүлэгүүдыешье уран гоёор уншажа, харагшадые  баясуулһан байна. Хүүгэд буряад хэлэндээ дуратайгаар хандажа, түрэл хэлэн дээрээ хэды омогорхомоор уншана гээшэб гэжэ Людмила Дампилова тэмдэглээ.