Буряад ТВ телесубагта айлшадгүй үдэр гэжэ байдаггүй. Намарай амаралтануудта Яруунын аймагай Мужыхын дунда һургуулиин захирал, багшанар болон үхибүүд сурбалжалагшын ажалтай дүтэ танилсаба. Буряад ТВ телесубагта тэдэ айлшалан ерээ.
Һонин мэдээсэл, дамжуулгануудые гаргадаг, олоной анхаралда дурадхадаг мэргэжэлтэдэй ажалай оньһотой эдир айлшад дүтэ танилсаба. Студи, камера болон гэрэлтүүлдэг түхеэрэлгэнүүдээр ехэтэ һонирхобо. Удаань Гэрэлма Жигдылмеева хүтэлэгшэтэй буряад үгэнүүдые тааха наада ехэ эбтэйгээр наадаа.
Һурагшадай амаржа байха үедэ багшанар, һургуулиин захирал ажалгүй байдаггүй.
Буряад ТВ субагай айлшад урматайнууд гэртээ бусаа. Зарим нэгэнниинь сурбалжалагшын мэргэжэл шэлэхэ баатай болоо. Теэд урдань үшөө жэлэй туршада һуралсал гараха саг байна. Тэрэ хугасаа соогоо дуратай мэргэжэлээ шэлэжэ үрдихэ.
