Бүхэли һарын туршада хотымнай сэсэрлигүүдэй хүмүүжэмэлнүүд, һурагшад, тэдэнэй гэртэхин буряад хэлэнэй габшагай һарын хэмжээндэ «Гэр бүлын жэлдэ» зорюулагдаһан элдэб мүрысөөнүүдтэ хабаадаа. Улаан-Үдын 32-дохи дунда һургуулиин дэргэдэ эдэ бүгэдэ мүрысөөнүүдэй дүнгүүд согсологдожо, габшагай һарын түгэсхэлэй баяр ёһолол үнгэрбэ. «Дашенька» сэсэрлигэй буряад хэлэнэй багша Евгения Бадмаева эгээл эрхимээр элдэб хэмжээ ябуулгануудта хабаадажа, шанда хүртэбэ. Тэрэ хэдэн жэлэй саана «Хүхюу фермэ» наада зохёогоод, мүрысөө эмхидхэжэ, үхибүүдые нааданай аргаар буряад хэлэндэ һургана.

«Номина» сэсэрлиг буряад хэлэ хүгжөөлгэдэ мүн лэ ехэхэн хубитаяа оруулна. Энэ сэсэрлигэй үхибүүд буряад хэлэ заадаг багшатаяа түрэл хэлэн дээрээ элдэб янзын наадануудай ашаар эрдэм мэдэсэеэ дээшэлүүлнэ. 

 «Хүхюу фермэ», «Дүрбэн тэгшэ», «Жаргалтай бүлэ», «Минии бүлэ –минии баялиг», «Гурбан бэрхэ» гээд мүрысөөнүүд хотын үхибүүдэй дунда эмхидхэгдэһэн байна. Һүүлэй үедэ мэдээжэ боложо, олоной һонирхол татана. 

Буряад хэлэ соёлоо хүгжөөлгэдэ иимэ хэмжээ ябуулганууд манай  уласта эмхидхэгдэжэ байһандань, ехэ һайшаалтай, ехэ шухала гээд баяр ёһолол дээрэ тэмдэглэгдээ. Үхибүүд иимэ һонирхолтой, зугаа наадатай аргаар буряад хэлэеэ үзэжэ, хүгжөөжэ байг лэ. Тиигэбэл, буряад хэлэмнай хэзээдэшье хосорхогүй!