Уластаа болон хажуудахи можо нютагуудта мэдээжэ «Бэлиг» түб хэдэн жэлэй туршада олон шэглэлээр ажалаа ябуулна. Түбтэ гүрэнэй оршуулгын албан, хэблэлэй-хинан заһалгын таһаг, хэблэхэ газар бии. Эгээл шухалань һургуулиин номуудые бүтээнэ, тэрэнэй хажуугаар уран бүтээлэй зүйлнүүдые.
Һаяын үдэрнүүдтэ «Яндекс» порталда оршуулгын таһагта буряад хэлэ оруулха тухай зүбшэн хэлсэгдэжэ, “Бэлиг” түб энэ ажал бэе дээрээ даажа абаба.
Түбэй хэжэ байһан түсэлнүүд олон. Һүүлэй жэлнүүдтэ жэл бүри 30 гаран ном хэблэгдэн гарана. Тэрэ тоодо сэсэрлигүүдтэ, болбосоролой эхин, дунда ба дээдэ hургуулинуудта үзэхэ, уншаха номууд, hуралсалай программанууд, багшанарай хэрэглэхэ онол аргын заабаринууд, хүүгэдтэ зорюулагдаhан уран зохёолой согсолборинууд, хүүгэдэй эвенк, hоёд хэлэнүүд дээрэ бүтээгдэһэн номууд болоно.
«Бэлиг» түбэй үшөө нэгэ һалбаринь – гүрэнэй оршуулгын албан болоно. Тэндэ янза бүриин хуулита гуримшуулгын дансануудай, баримта бэшэгүүдэй болон уран зохёолнуудай оршуулга дээрэ хэдэн хүн ажаллана.
Бүхыдөө «Бэлиг» түб гуша гаран жэлэй туршада һургуулинуудые буряад хэлэнэй ба уран зохёолой һуралсалай номуудаар хангажа, буряад хэлэ хүгжөөжэ, сахиха хэрэгтэй горитой хубитаяа оруулна.
