50 жэлэй туршада эндэ дуу хатараар хэдэн үе соёлшод хүмүүжүүжэ, Буряад Уласай, мүн бусадшье нютаг можонуудай ехэ тайзанууд дээрэ тоглохо шадабаритай боложо далижан гаранхай. Эдэ бүгэдэ мэргэжэлтэдэй үлгы - Зүүн Сибиириин соёл урлалай ехэ һургуулиин хүгжэм, хатарай таһаг байгуулагдаһаар 50 жэлэйнгээ ой тэмдэглэхэнь.

50 жэлэй ойгоо соёлшод үргэн хэмжээндэ тэмдэглэхээр хараална. Һайндэртөө дашарамдуулан уласхоорондын залуушуулай “Престиж” гэһэн 2-дохи мүрысөө соносхобо. Октябриин 23-һаа 25 болотор тэрэ урилдаан үнгэрхэ юм. “Престиж” конкурс 1990-ээд онуудта байгуулагдажа, баян түүхэтэй болонхой. Дуу хатарай таһагай оюутадай хоорондо эмхидхэдэг байһанаа, мүнөө уласхоорондын хэмжээнэй боложо, олон тоото бэлигтэй залуушуулые дэмжэнэ, тайзанай шэнэ одод бии болоно. 

 “Престиж” мүрысөөндэ 35 наһаяа гүйсөөдүй оюутад, балетмейстернууд хабаадаха аргатай. Бэлигээ харуулха, шадабарияа шалгаха мэдүүлгэнүүдые Хитад, Монгол, Казахстан гүрэнүүдэй, Оросой можно хотонуудһаа 70 гаран түлөөлэгшэд үгөөд байна гээд эмхидхэгшэд тодорхойлно. Гадна ойн баярай хэмжээ ябуулгануудай шугамаар “зохёолгын уулзалга”, “түхэреэн шэрээ”, “шадабари” гэхэ мэтэ талмайнууд ябуулагдаха. Хабаадагшад «Методика преподавания хореографических дисциплин: практический опыт и современные подходы» гэһэн мэргэжэлээ дээшэлүүлгын тусхай һуралсал гаража, үнэмшэлгэнүүдые абаха юм.