8-тайһаа 12-той болотор наһанай уласай шамбайхан хүбүүд сүлөөтэ барилдаагаар мүрысөөндэ суглараа. Эдир тамиршадай зариман һаял барилдажа эхилэнхэй, нүгөөдүүлынь 2–3 жэлэй туршада амжалтатай барилдаад, нэгэдэхи разряд хэжэ үрдинхэйнүүд.

Сүлөөтэ барилдаагаар мүрысөөн Сэрэгэй тусхай ябуулгада баатаршалга гаргажа хосорһон залуу сэрэгшэ Александр Зарбуевай мүнхэ дурасхаалда зорюулагдаа. Тэрэ эхин ангиин һурагша ябахаһаа, Манжуевай нэрэмжэтэ арбадахи тамирай һургуулида бэеэ һоридог, барилдаанай секцидэ ябадаг байһан юм. 2017 ондо барилгын ба хотын ажахын техникумдэ ороһон, 2020 ондо Владивосток хотодо далай дээрэ сэрэгэй алба хаахаяа мордоо бэлэй. 

 Мүрысөөндэ уласай аймагуудай болон хотын тамирай һургуулинуудай бэрхэ тамиршад хаба шадалаа туршаа. Гэхэ зуура, аймаг бүхэндэ, хотын тамирай байшангуудта дүршэл ехэтэй һоригшод заадаг юм. 

Һуралсалай хаһын эхилһээр, уласай хэмжээнэй мүрысөөнүүд байд гээд лэ үнгэржэ байдаг. Тиигэжэ тамирайнгаа  зам эхилжэ ябаһан жаахан баатар хүбүүд бэлиг шадабарияа мүли мүлиһөөр, ерээдүйдэ абарга зиндаатайнууд болохонь лабтай.