Заншалта ёһоор, буряад хэлэнэй габшагай һарада Буряадай Үндэһэтэнэй нэгэдэхи лицей-интернат 15-дахияа сахим номоор «Эхэ хэлэн» гэһэн мүрысөө үнгэргэбэ. Байгша ондо эрдэм мэдэсэеэ туршахаа 100-аад хабаадагшад суглараа. Тэдэнэй тоодо Хэжэнгын аймагай Ханда Павлова хоёрдохиёо хабаадажа, түрүүшын һуури эзэлээ.

Энэ мүрысөөндэ 2-дохи ангиһаа эхилээд, 11-дэхи хүрэтэр, һурагшад оролсодог. Түнхэнэй, Хурамхаанай, Захааминай, Яруунын, Хэжэнгын аймагуудһаа ерэһэн хабаадагшад ёһотоор бэлдэжэ ерээ. Тус сахим номой сэдэбүүд тон гүнзэгы даабаринуудтай. Нэрлэбэл, “Эрэ хүнэй уялга үндэр”, “Заншалаа алдаагүй арад”, “Энэ дэлхэйдэ эжым гансахан” гэхэ мэтэ. Үхибүүд энээн доторхи даабаринуудые жэншэд гүүлэнгүй дүүргэдэг шахуу болонхойнууд. Шалгарһан үхибүүдтэ мүрысөөнэй 15 жэлэй ойдо зорюулагдаһан энгэрэй тэмдэгүүд зүүлгэгдээ, Дипломууд болон мүнгэн шангууд барюулагдаа.

Сахим ном гаргалга олон мэргэжэлтэдэй аша туһаар бүтээгдэһэн гээд дахин һануулая. Буряадай гүрэнэй Ехэ һургуулиин, юрэнхы болбосоролой һургуулинуудай багшанар, уран зураашад, зохёолшод, сэтгүүлшэд эдэбхитэйгээр хабаадаһан. Энэ номоор хэдэн үе һурагшад буряад хэлэеэ шудална.

Буряад хэлэ хүгжөөлгэдэ сахим номоор мүүрысөөнэй үүргэ аргагүй ехэ. 15 жэлэй хугасаа соо үнгэргэгдэжэ, уласай шабинарые эхэ хэлэндэнь эльгэлүүлнэ, доторынь буряад сэдьхэлтэй болгоно гээшэ ааб даа.