Хори буряадай уг гарбалай Хүн шубуун Эхэ-Хори хатан Эжы нютаг дээрэ олон тоото айлшадые уг изагуурһаа сахижа ябаһан заншалаар, сагаан эдеэгээр, хүхэ номин хадагаар золгон, халуунаар угтан абаба. Ушарынь гэхэдэ, Хориин аймагай Булам һайхан нютагһаа гарбалтай Буряад Уласай арадай зүжэгшэн, Гүрэнэй шангай лауреат Чимит Дарижапович Ринчиновэй дурасхаалай мүрысөөн зүжэгшэдэй дунда эмхидхэгдэһэн байна.

Эндэ аймагай гушаад шахуу эрхим артистнар “Шогтой буряад Түдэб баабайнда” гэһэн урилдаанда хабаадажа, тайзан дээрэ богонихон зүжэглэмэл наадануудые, монолог табижа, олониие баясуулаа. Тэдэнэй тоодо Соелма Бадмаева хүтэлбэрилэгшэтэй Булам нютагай һургуулиин һурагшад. 

Чимит Ринчиновэй нэрэ, үнэхөөрөөшье, олон зон мэдэхэ, арадай зүжэгшэн гэһэн нэрэ зэргэнь дэмыдэ олгогдоо бэшэ. “Будамшуу” гэжэ зүжэгтэ наадаһан Һорнии баянай дүрэ Чимит Дарижаповичай наадаһан бүхы дүрэнүүдэй дунда онсо һууритай, олондо мэдээжэшье. 

Чимит Ринчиновэй дурасхаалай үдэшэ дулаахан оршондо үнгэрөө. Олон нүхэд, түрэлхидынь сугларжа, аймагай нютаг һуурингуудай бэлигтэй зүжэгшэдэй наада хаража, халуун альга ташалга бэлэглээ.  

 Зүжэгшэдэй мүрысөөнэй дүнгүүд хоёр шэглэлээр гаргагдаа. Тайзан дээрэ монолог уншагшадай дунда Чимит Ринчиновэй Булам тоонто нютагай “Мүнхэ гэрэл” гэһэн арадай аман зохёолой бүлгэм түрүү һуури эзэлээ. Хүтэлбэрилэгшэнь – Цыпелма Гатапова. Мүрысөөнэй хоёрдохи шэглэлээр зүжэг табигшадай дунда түрүү һуурида  Ашангын Соёлой байшангай бүлгэм гараба. “Түдэб баабайнда” үшөөшье олон бэлигтэй зүжэгшэд сугларжал байг гэжэ айлшад, хабаадагшад үреэбэ. Гэхэ зуура, энэ хэмжээ ябуулгые саашадаа улам үргэдхэжэ, уласай хэжээндэ гаргаха хүсэлөө тэдэнэр мэдүүлһэн байна.