Улас дотор хүйтэн уларил тогтожо, нуур, гол горход хүрэжэ эхилбэ. Уһан дээрэ аюулгүй байдал сахиха албатад дулаан хаһын ажалайнгаа дүнгүүдые согсолбо. Байгша оной 9 һарада улас нютаг һуурингуудаар 44 аюулта ушарнууд болоһон байна. 31 хүн шэнгэжэ ами наһантаяа хахасаа. Тэрэ тоодо наһаа гүйсөөдүй үхибүүдшье оролсоно. Тиигэбэшье, урдахи жэлнүүдтэ ороходоо, уһан дээрэхи аюулнуудай тоо 2 дахин бага болоо гэжэ мэргэжэлтэд тэмдэглэнэ.
Буряад Улас дотор навигаци октябриин 25 болотор үргэлжэлхэ, Байгал далайда - ноябриин 10 болотор. Харин зарим загаһашад навигациин дүүрэһэнэй удаа хуули эбдэжэ, нүүр дээрэ гаража, аюултай байдалтай тохёолдодог. Тэдэ гэрэлгүй онгососоор, тусхай абарлагын хэрэгсэлнүүдгүйгөөр уһан дээрэ гарадаг. Һүүлшын 5 жэлэй туршада ГИМС-ын мэргэжэлтэд ноябрь, декабрь һарануудта заабол хүнүүдые абарха ушар болодог гэжэ Николай Зайцев хөөрэнэ.
Уһан дээрэ аюулгүй байдал сахигшад түхэреэн жэлэй туршада һэргылэмжын хэрэг ябуулна. Нэн түрүүн үхибүүдтэ голой, нуурай эрьедэ болгоомжотой байхань шухала гэжэ ойлгуулха хэрэгтэй. Тэрэнэй хойно гэртэхиндэнь, ехэшүүлдэ уһан дээрэ яажа бэеэ абарха, аюулгүй байдал сахиха тухай дахин һануулха хэрэгтэй гээд мэргэжэлтэд тодорхойлно.
