Табан хушуун мал, түрэһэн тоонто болон элинсэгүүд тухай шүлэгүүд Улаан-Үдэ хотын «Забайкальский» гэһэн Соёлой байшанда зэдэлбэ. Уран уншагшадай мүрысөөндэ сэсэрлигэй багашуул болон һургуулиин дунда ангиин һурагшад түрүү һууриин түлөө тэмсэбэ.
Буряад хэлэнэй габшагай һарын гаршаг доро жэл бүри «Забайкальский» гэһэн Соёлой байшанда үхибүүдтэ зорюулагдаһан хэмжээ ябуулганууд эмхидхэгдэдэг. Зургаатайхан Базаржап Имескенов уншагшадай мүрысөөндэ мүнөө гурбадахияа хабаадаба. Гэртээ эжы абатаяа буряадаар хөөрэлдэдэг, зунай сагта Түнхэнэй аймаг түрэлдөө ошожо айлшалаад ерэхэдээ, заабол шэнэ үгэнүүдтэ һураад ерэдэг гэжэ эжынь хубаалдана.
«Минии буряад хэлэн» гэһэн уран уншагшадай мүрысөөндэ хүүгэдэй сэсэрлигэй болон 55-дахи һургуулиин һурагшад ехэ дуратайгаар ерэжэ, жэлһээ жэлдэ хабаададаг.
Мүрысөөнэй илагшадта Дипломууд болон гарай бэлэгүүд барюулагдаа. Гадна хабаадагшад Баярай бэшэгүүдтэ хүртөө. Нёдондонойхидо орходоо, байгша ондо хабаадагшадай тоо үсөөн байба гэжэ шүүгшэд тэмдэглээ. Гэхэ зуура, тэдэнэр уласайнгаа ажаһуугшадые буряад хэлэнэй мүрысөөнүүдтэ эдэбхитэйгээр хабаадахые уряална.
