Буряад Уласта хүйтэнэй сагай ерэхэ бүри хатуу түлишэ худалдан абаха талаар асуудалнууд жэл бүхэндэ гарадаг. Гэхэ зуура, түлеэнэй сэн жэл бүхэндэ дээшэлнэ. Тиимэһээ уласай ажаһуугшад зайн галаар дулаасуулха арга шэлэнэ, тиихэдэ зайн галай һужанууд энээниие даанагүй бшуу. Байгша ондо энэ орёо асуудал Баргажанай аймагай Баргажанай-Адагай һунгамалнуудай зүблэлэй түрүүлэгшын гуйлтаар Арадай Хуралда ажалай зүблөө үнгэргэбэ.

Уулзалгын сэдэб хадаа ажаһуугшадта хатуу түлишэ –  түлеэ худалдан абаха тухай байгаа. Энэ асуудал тон шухала, юундэб гэхэдэ үбэл ойртожо байна, гэбэшье уласай ажаһуугшадай бэшэһээр, түлеэн үгы. Иимэ хатуу хүндэ байдалһаа яажа гарахаб гэһэн мэдүүлгэнүүдые аймаг бүхэнэй түлөөлэгшэд, Арадай Хуралай һунгамалнууд оруулһан байна. 

Хуралдаанай дүнгөөр, түлеэ залһа бэлдэлгын талаар хэсүү байдал олон ушарһаа тохёолдоо. Нэгэдэхеэр, юрын зондо ой тайга руу орохо хорюул тогтоогдонхой, хоёрдохёор, федеральна хуулиин эрилтээр түлеэ бэлдэхэ сүлөө талмай бага, энээнһээ гадна, бусадшье хорюулнууд бии. Тиимэ һэн тула энэ асуудал түргэн сагай болзорто шиидхэхэ шухала. Энэ хадаа гансашье уласай хэмжээнэй асуудал бэшэ, мүн лэ эндэ федеральна Засаг түрын талаһаа дэмжэлтэ хэрэгтэй байна.