Хотын уншагшадай мүрысөөндэ 63-дахи һургуулиин 5-дахи ангиин һурагша Эрдэни Цыремпилов түрүүшынхиеэ  хабаадахаа ерээ. Шираб Нимбуевай “Тархайн хүбүүн Зархай” гэһэн олондо мэдээжэ онтохо тэрэ сээжээр, олоной дура татама гоёор уншаба.

 “Минии бүлэ – минии баялиг” мүрысөөн Гэр бүлын жэлдэ зорюулагдана. Тус эдир уншагшадай мүрысөөн 35-дахи һургуулиин дэргэдэ мүнөө жэл 3-дахияа эмхидхэгдэбэ. Эндэ бүхы хотымнай һургуулинуудай һурагшад сугларжа, элдэб зохёолнуудһаа хэһэгүүдые шэлээд, уран гоёор уншаһан байнад. Һургуулиин багшанар ба һурагшад ерэһэн айлшадаа халуунаар угтаба гэжэ тэмдэглэлтэй. 

Буряад зон,нээрээшье, гэр бүлэеэ гамнажа, аха зоноо хүндэлжэ, гал гуламтаяа сахижа, ёһо заншалаа наринаар абажа ябадаг гээшэ ааб даа. “Минии бүлэ – минии баялиг” гэһэн мүрысөөн ургажа ябаһан үхибүүдэй мэдэсые үргэдхэнэ, тоонто нютаг, гэртэхиндэ нимгэн сэдьхэл түрүүлнэ, арадайнгаа ёһо заншал мэдэжэ, буряад хэлэеэ үргэжэ, дэмжэжэ ябахые уряална!