Оросой арадай зүжэгшэд Людмила Дугарова, Лариса Егорова, Марта Зоригтуева, РСФСР-эй габьяата зүжэгшэн Дарима Сангажапова, Оросой габьяата зүжэгшэд Чингис Гуруев, Дамбадугар Бочиктоев гэгшэд наһанайнгаа намтарһаа тохёолдоһон элдэб ушарнуудые харагшадтаа хөөрэжэ үгэбэ.  

Буряад театрай уран һайханай ударидагша Олег Юмов суг хүдэлжэ байһан зүжэгшэдэйнгөө намтар ямаршье бэшэгдэһэн зохёолһоо дээрэ гэжэ бодоод, автофикш гэһэн шэнэ маягаар зүжэгөө бэлдэһэн байна. 

Энэ түсэл Буряад Уласай Соёлой яаманай болон Засагай газарай дэмжэлгээр бэелүүлэгдэнэ. «Зүжэгшэн» хоёр үдэрэй туршада харуулагдаха, теэд Буряад ТВ субагай сүлжээ холбоонуудта болон Рутюб дээрэ октябриин 18-да үдэшын зургаа хахадһаа сэхэ дамжуулгада хараха аргатайт.