Октябриин 17-18-ай үдэрнүүдтэ уластамнай В. Филипповэй нэрэмжэтэ хүдөө ажахын академидэ «Мы с Дальнего Востока» гэһэн патриотическа хуралдаан үнгэржэ байна. Иишэ Алас Дурнын федеральна тойрогой дээдэ һургуулинуудһаа оюутадай өөрын захиргаанай, патриотическа нэгэдэлнүүдэй, һайн дураараа туһалагшадай хүдэлөөнүүдэй хүтэлбэрилэгшэд ерээ.

Энэ хуралдаанда 250 гаран хабаадагшад, хүндэтэ айлшад ерэһэн байна.  Уласай Засагай газарһаа, академиин, Алас Дурнын тойрогой түлөөлэгшэдэй зүгһөө тэдэндэ хандаһан амаршалгын үгэнүүд хэлэгдээ, һайхан тоглолто дурадхагдаа. 

Хуралдаанай гол зорилго хадаа гражданска-патриотическа хүмүүжүүлгын эрхим дүй дүршэлөөр андалдаха, сэрэгэй тусхай ябуулга байһан сэрэгшэдээ дэмжэхэ, Алас Дурна зүгэй дээдэ һургуулинуудай патриотическа клубууд болон нэгэдэлнүүдэй харилсаха ажал эршэдүүлгэ болоно. 

Хуралдаанай хэмжээндэ панельнэ талмай дээрэ  форсайт-сесси үнгэрөө. Тэрэнэй хажуугаар дрон яажа  ниидхүүлхэ, тактическа эмнэлгээр мастер-классууд, викторина, бизнес-наадан гэхэ мэтэ үнгэргэгдэхөөр хараалагдаа. Мүн лэ хуралдаанай нэгэ дэбисхэртэ Хангаловай нэрэмжэтэ түүхын музей «Стойкость, верность, отвага» гэһэн үзэсхэлэнөө дэлгэгдээ. Үдэшэ Россиин Герой Алдар Цыденжапов тухай «9 секунд» гэһэн фильм дурадхагдаха, айлшад уласаймнай түүхэтэ, соёлой, байгаалиин үзэсхэлэнтэ газарнуудаар аяншалха.