Буряадай ниислэлдэ “Голос родного города – Түрэл хотын уран зохёолгой аялга” гэһэн түсэл бэелүүлэгдэжэ байна. Энэ түсэлэй хэмжээндэ хараа муутай зондо буряад хэлэн дээрэ аудиономууд хэблэгдэжэ эхилбэ. Августын 1-дэ Буряад Уласай Олониитын дэмжэлгын түбтэ “Улаан-Үдын үдэр” гэһэн хэмжээ ябуулга үнгэрбэ. Энэ тус аудиономуудай уридшалан харалга үнгэрөө.
Хараа муутай зондо зорюулагдаһан түрүүшын аудиономууд буряад зохёолшодой номууд дээрэ үндэһэлэнхэй: Сергей Доржиевай “Сарюухан сагаан сахюусамни”, Галина Базаржаповагай “Буусын һургаал” ба Доржо Сультимовай “Эхын захяа”.
“Улаан-Үдын үдэр” гэһэн хэмжээ ябуулгада социальна түсэлнүүдые бэелүүлхэ амжалтатай жэшээнүүд элдэб сэдэбтэ талмайнууд дээрэ дурадхагдаа, мүн лэ викторинанууд, мастер-классууд болон олон бусад нааданууд үнгэргэгдөө.
