Арадай Хурал, Буряадай оперо болон баледэй театр, Зүблэлтын талмай, Буряадай гүрэнэй филармони, хүгжэмтэ фонтан. Энээн тухай эдир экскурсоводууд буряад хэлэн дээрэ аяншалагшадта хөөрэхэ аргатай болобо. «Эхэ хэлэн-манай баялиг» гэhэн нааданда хабаадажа шалгарагшад июниин 17-hоо 27 болотор, «Асториум» гэhэн болбосоролой түбтэ эдир экскурсоводуудай хизаар ороноо шэнжэлэлгын hургуулида hуража гараа. Энэ hуралсалай программа дүрбэн шэглэлтэй байгаа, тэдэниие нэрлэбэл: хизаар ороноо гүнзэгыгөөр мэдэлгэ; уласай аяншалгын оршомтой танилсуулга, буряад хэлэн дээрэ экскурси бэелүүлгэ; сүлжээ холбоондо экскурсоводой мэдээжэ болохын тула ажал ябуулга; буряад хэлэ хэрэглэлгэ.Хабаадагшад энэ үдэрнүүд соо буряад хэлэн дээрэ өөhэдынгөө hанал бодол дэбтэр дээрэ бэшэжэ, түрүүшынгээ экскурси дүнгэй ажал болгон харуулаа. «Буряад ФМ» радио  «Хии морин» гэһэн Соёлой ба зохёохы түб хоёр энэ hургуули эмхидхэhэн байгаа.