Хотымнай «Асториум» түбтэ һурагшадта зорюулагдаһан элдэб хэмжээ ябуулганууд олоор эмхидхэгдэжэ байдаг юм. Тиихэдэ энэ үдэрнүүдтэ түбтэ «Лидеры позитивных изменений» гэһэн түсэл бэелүүлэгдэбэ.  Энэ халаанда һургуулидаа элдэб хэмжээ ябуулгануудта хабаададаг, эгээн эдэбхитэй, эрхим һурагшад суглараа. 10 үдэрэй туршада 15 үхибүүд олон хэшээлнүүдтэ ябаа, олон шэнэ юумэндэ һуража гараа. Һүүлшын үдэртэнь тэдэнэр 3 шэглэлээр түсэлдэ бэлдэжэ ерээд, олоной урда тэдэнээ дурадхаһан байна. Нэгэдэхеэр, бүхыдөө энэ түсэл үхибүүдтэ ехэл һайшаагдаа, хабаадагшад ехэл дуратайгаар хэшээлнүүдтээ ерэдэг байгаа. Хоёрдохёор, тэдэнэр «Асториум» түб руу ерэхэдээ, үхибүүдээр танилсажа, олон нүхэдтэй болодог. Энэ түбтэ саг үргэлжэ бэлигтэй үхибүүд элирүүлэгдэдэг,  шадабаринь улам хурсадхагдажа байдаг юм.